Euskadiko Orkestra eta Kepa Junkera
2010eko otsailan komuneko lehenengo esperientzia ondoren, Euskadiko Orkestra Sinfonikoak eta Kepa Junkera trikitilariak proiektu bikoitza dute orain eskuartean: batetik, elkarrekin grabatu duten diskoa eta, bestetik, 2012ko martxoan izango diren KlasikAT zikloaren baitako kontzertua. Orkestraren ziklo honek klasikoaz at geratzen diren musika-estiloak lantzen ditu. Ekoizpen berri honen musika-zuzendaria Enrique Ugarte da eta Keparen lanaren aukeraketa bat bilduko du, oraingoan bertsio sinfonikoan. Izan ere, estreinako aldia da Kepak orkestra sinfoniko batekin grabatzen duela. Lan berri hau, bakoitza bere alorrean, gure herriaren ondare musikal tradizional zein garaikidearen sustapenaren eta handitzearen erreferente diren Kepa Junkera zein Euskadiko Orkestraren ekoizpen diskografiko aberatsari gehituko zaio.
