Gorgorito eta Garrafito, agente sekretuak
Maese Villarejo familiarteko txotxongilo konpainiak Gorgoritoren abenturak publikoari gerturatzen 60 urte bete zituen iragan 2012an. Iaz bezalaxe, Baluarteko Eguberriko Denboraldiaren baitan Gorgoritoren hiru istorio eskainiko ditu konpainiak: hiruetan Gorgorito protagonista izango da bere lagunak defendatzen. Baina Gorgoritok haur ikuslegoaren laguntza behar izango du sorgina eta beste hainbat maltzurrei aurre egiteko.
Laburpena
Ciriaka Sorginak eta Hortz-Luzeak Ogroak Listorro irakaslearen formula sekretua lapurtu nahi dute, formula honi esker petrolioa erregai garbi eta merke batengatik ordezkatu bait liteke! Hori lortzeko, Listorro irakaslea bahitu eta bere laborategi sekretuan giltzaperatzen dute. Baina irakasleak ezkutuko aztarnak usten ditu Gorgorito eta Garrafitok bere bila joan eta libre utzi ahal izateko. Baina laborategia tranpa eta pasabide sekretuz josita dago eta, gainera, Sorginak eta Ogroak ez diete nola edo hala irakaslea aurkitzen utziko.
