Joan Baez
Joan Baez AEBko folk abeslari ezaguna Baluartera helduko da An Evening With Joan Baez biraren baitan. Gurean eskainiko duen kontzertuan bere errepertorio zabaletik errepaso eginen du. Iruñekoa Estatuan egingo duen biraren lehen geldialdia izango da eta ondoren Bilbo, Madril, Bartzelona, Gijón eta Santiago de Compostela bisitatuko ditu. Protesta kantaren erreginak 60ko hamarkadetako musika jaialdi garrantzitsuenetan jo zuen (gogoangarria izan zen, esaterako, Woodstocken, 1969an eskainitako kontzertua) eta mundu zabalean ezaguna egitearekin batera, hazi egin zen politikarekiko konpromisoa. Hala, garai hartako gizarte mugimenduetan aitzindari izan zen: Vietnameko Gerraren kontrako mugimenduaren irudi izan zen eta Martin Luther Kingekin batera, 1963an eskubide zibilen alde egindako martxan parte hartu zuen.
